काठमाडौ– मुग्लिन-मलेखु सडक स्तरोन्नतिको काम कछुवा गतिमा अघि बढेको छ। हालसम्म २५ प्रतिशत प्रगति भएको छ।

विश्व बैंकको सहुलियतपूर्ण ऋणमा सडकको स्तरोन्नति गरिएको हो। यो सडक हुँदै राजधानी प्रवेश र बाहिरिने भएकाले सवारी साधनको निकै चाप हुने गर्दछ। यो सडक हुँदै दैनिक १५ हजार हाराहारी सवारी साधन आवतजावत गर्ने अनुमान छ। सडक स्तरोन्नतिमा ढिलाइ हुँदा राजधानी प्रवेश र बाहिरिने यात्रुले अहिले हैरानी व्यहोर्नुपरेको छ ।

नागढुंगा-मुग्लिन सडक आयोजनालाई तीन प्याकेज छुट्टाएर स्तरोन्नतिको काम भइरहेको छ। करिब ९५ किलोमिटर दुरी रहेको यो सडक खण्ड तीन प्याकेज छुट्टाएर स्तरोन्नति गरिएको हो। पहिलो प्याकेजमा नागढुंगा-नौविसे, दोस्रोमा नौविसे-मलेखु र तेस्रोमा मलेखु-मुग्लिन गरी छुट्टाइएको छ।

पहिलो प्याकेजअन्तर्गत नागढुंगा(नौबिसे १२ दशमलव २६ किलोमिटर, दोस्रो ४३ दशमलव ५४ किलोमिटर र तेस्रो ३८ दशमलव ८६ किलोमिटर छ। तेस्रो प्याकेजअन्तर्गतको नागढुंगा(मुग्लिन सडक योजना पश्चिम खण्ड चितवनका इन्जिनियर विजय दरैका अनुसार अहिले सडक खण्डमा कालोपत्रे र पुलको काम जारी छ। दैनिक २०० हाराहारीले काम गरिरहेको उनले बताए।

चुम्लिङटार, कुरिनटार र लेवाटार क्षेत्रमा चार किलोमिटर सडकको दुई लेन कालोपत्रे गरिसकिएको छ। बजार क्षेत्रमा चार लेन सडक बन्नेछ। कुरिनटार, लेवाटार र चुम्लिङटारका बाँकी क्षेत्रमा कालोपत्रेको काम भइरहेको छ। फिस्लिङ, बेनिघाट र चरौँदीमा सबबेसको काम गरिँदै छ। सो सडक खण्डमा पर्नेछ पुलमध्ये चार वटाको सबस्ट्रक्चर सम्पन्न गरिएको जनाउँदै दराईले असारसम्ममा चार पुल सम्पन्न गर्ने योजना रहेको बताए।

चरौँदी र हुग्दिका दुई पुलको फाउन्डेसनको काम भइरहेको छ। अन्य क्षेत्रमा पनि सडक विस्तारको काम भइरहेको छ। भित्तो काट्ने र तलबाट उठाउने काम गरिँदै छ। कतिपय ठाउँमा नाली निर्माणको काम भइरहेको छ।

आयोजनाका प्रमुख केदारप्रसाद नेपालले असार मसान्तसम्ममा १६ किलोमिटर कालोपत्रेको काम सम्पन्न गर्ने लक्ष्य रहेको बताए। यसैगरी, चार पुल सम्पन्न गर्ने लक्ष्यका साथ काम भइरहेको छ। उनले भने,गत वर्षको पुस-माघमा पाँच प्रतिशत मात्रै काम भएको थियो। लक्ष्य लिएको १६ किलोमिटर सडकमध्ये आठ किलोमिटर बजार क्षेत्रमा पर्दछ। बजार क्षेत्रमा चार लेन सडक हुने हुँदा समय लाग्ने भएकाले अहिले बजार केन्द्रीय काम गरिएको बताए।

विद्युतका खम्बा सार्ने काम अझै सकिएको छैन। नेपालका अनुसार ९० खम्बामध्ये ५० सार्न बाँकी छ। सरकारी वन क्षेत्रका रूख काट्ने काम सकिएको छ। समयमा निर्माण सामग्रीको उपलब्धता नहुँदा काममा समस्या आएको उनले बताए। यसका अतिरिक्त निर्माण कम्पनीले आवश्यक स्रोतसाधन परिचालन गर्न नसक्दा पनि समयमा काम सम्पन्न गर्न नसकिएको उनको भनाइ छ।

ठेक्का सम्झौता विसं २०७९ पुस १५ गते भएको हो। कुल चार अर्ब ८० करोड ५९ लाख रुपैयाँ लागतमा शर्मा-जेडआईसीजीले यो सडक खण्ड निर्माणको जिम्मा पाएको थियो। सम्झौताअनुसार ०८२ पुस १५ भित्र यस खण्डको काम सकिसक्नुपर्ने हो।

यही सडक खण्डमा गत असोज ११, १२ र १३ गते परेको भीषण वर्षाका कारण कृष्णभिरलगायतका क्षेत्रमा नयाँ पहिरो खसेको थियो। ती पहिरोको व्यवस्थापनका लागि लागत अनुमानको काम भइरहेको छ। यस खण्डका छ स्थानमा पहिरो जाँदा सडकमा पूर्ण रूपमा क्षति पुगेको थियो।

कृष्णभिरमा करिब १०० मिटरसम्म सडक भासिएको थियो। सडक स्तरोन्नतिसँगै सोको पुनः निर्माणसमेत गर्नुपर्ने हुन्छ।