गोरखा– २०७२ मा गएको विनाशकारी भूकम्पले भत्काएको घैरुङ स्वास्थ्य चौकीको पुनर्निर्माण सम्पन्न भएको छ। अब आधुनिक सुविधासहितको भवनमार्फत स्थानीय बासिन्दाले स्वास्थ्य सेवा प्राप्त गर्न सक्ने भएका छन्।

सहिद लखन गाउँपालिका-६ स्थित घैरुङ स्वास्थ्य चौकीको नयाँ भवन निर्माण कार्य पूरा भई सेवा सञ्चालनको तयारी भएको छ। पुनर्निर्माणका लागि आठ करोड ५४ लाख छ हजार खर्च भएको छ। उक्त पुनर्निर्माण कार्य स्वास्थ्य तथा जनसङ्ख्या मन्त्रालय र भारत सरकारको आर्थिक सहयोगमा सम्पन्न भएको हो।

गाउँपालिकाका अध्यक्ष रमेशबाबु थापामगरका अनुसार स्वास्थ्य चौकीको नवनिर्मित भवनमा ४५ कोठा छन्, जसले गुणस्तरीय स्वास्थ्य सेवा प्रदान गर्न मद्दत गर्नेछ। उनले चैतदेखि नयाँ भवनबाट सेवा प्रवाह गरिने जानकारी दिए।

२०७२ साल वैशाख १२ गतेको भूकम्पले स्वास्थ्य चौकीको पुरानो भवन पूर्ण रूपमा भत्काएपछि हिमालय माध्यमिक विद्यालयमा सञ्चालन हुँदै आएको थियो। अस्थायी व्यवस्थाबाट सेवा प्रवाह गर्दा विभिन्न कठिनाइहरू भइरहेका थिए, तर अब स्थायी र सुव्यवस्थित संरचना तयार भएसँगै सहज सेवा प्रदान गर्न सकिनेछ।

नयाँ भवन निर्माणले स्थानीय बासिन्दालाई स्वास्थ्य सेवा लिन लामो दूरी यात्रा गर्नुपर्ने समस्याबाट मुक्त गर्नेछ। आधुनिक पूर्वाधारयुक्त यो स्वास्थ्य चौकीले मातृ तथा शिशु स्वास्थ्य, आकस्मिक सेवा, सामान्य उपचार र अन्य आवश्यक स्वास्थ्य सेवा प्रभावकारी रूपमा प्रदान गर्ने अपेक्षा गरिएको छ।

स्थानीय बासिन्दा, स्वास्थ्यकर्मी र सरोकारवाला निकायहरूले नवनिर्मित भवनप्रति खुसी व्यक्त गर्दै गुणस्तरीय सेवा प्रवाहका लागि आवश्यक जनशक्ति र स्रोतसाधनको व्यवस्थापनमा ध्यान दिनुपर्ने आवश्यकता औँल्याएका छन्। नयाँ स्वास्थ्य चौकीको सुरुवातसँगै जिल्लाको स्वास्थ्य सेवा प्रणालीमा सुधार आउने आशा गरिएको छ।