+
Search

ताजा अपडेट +

पपुलर +

न्यु भिजन नेपाल र थर्ड रक एडभेन्चर्सको आयोजनामा बारपाक-लाप्राकमा योग शिविर

4KNationalDaily
२०८१ माघ २६, शनिबार १५:२० बजे

गोरखा- बारपाक सुलीकोट गाउँपालिका बारपाक र धार्चे गाउँपालिका लाप्राकमा विशेष योग शिविर सम्पन्न भएको छ । न्यु भिजन नेपाल र थर्ड रक एडभेन्चर्सको संयुक्त आयोजनामा लियो नारायणगढका ४० जना लियो सदस्यहरूले सहभागिता जनाएका थिए ।

स्वास्थ्य र मानसिक शान्तिको लागि योग महत्त्वपूर्ण भूमिका खेल्ने विश्वासका साथ आयोजित यो शिविरमा सहभागीहरूलाई योग तथा ध्यान अभ्यासको महत्वबारे जानकारी गराइएको थियो । शिविरमा न्यु भिजन नेपालका अध्यक्ष अशोक शर्मा भट्ट र सचिव सबनम खड्गी ले हठ योग प्रशिक्षण दिएका थिए । उनीहरूले शरीरलाई स्वस्थ राख्न सकिने विभिन्न योग मुद्राहरू श्वासप्रश्वास नियन्त्रणका प्रविधिहरू तथा ध्यान प्रविधि सिकाएका थिए ।

कार्यक्रमको उद्घाटन न्यु भिजन नेपालकी सचिव खड्गीले परम्परागत कुमारी नृत्य प्रस्तुत गरेर गरेकी थिइन् । शिविरमा विभिन्न चरणहरूमा योगका अभ्यासहरू गराइएका थिए । सहभागीहरूले शारीरिक लचिलोपन बढाउने आसनहरू ध्यान केन्द्रित गर्ने प्रविधिहरू तथा मानसिक शान्ति प्रदान गर्ने सत्रहरूमा सहभागिता जनाए । विशेष गरी हठ योग र प्राणायाम विधिहरूमा विशेष ध्यान दिइएको थियो ।

त्यसै गरी शिविरमा सिङ्गीबल हिलिङ्ग प्रविधि समेत अपनाइयो । सिङ्गीबलबाट ऊर्जा उपचार (हिलिङ्ग) गरेर मानसिक र शारीरिक शिथिलता हटाउने प्रयास गरियो साथै सहभागीहरूलाई साउन्ड थेरापी को माध्यमबाट मानसिक स्थिरता र आत्मशुद्धिका उपायहरू पनि प्रदान गरिएको आयोजकले जनाएको छ ।

बारपाक-लाप्राक क्षेत्र भूकम्पपछि पुनर्निर्माण हुँदै गएको क्षेत्र हो । भट्टले भने- ‘केवल शारीरिक स्वास्थ्य मात्रै नभई मानसिक र आध्यात्मिक उन्नतिको लागि पनि यो शिविर आयोजना गरेका हौँ । आगामी दिनमा पनि यस्ता कार्यक्रमहरूलाई निरन्तरता दिनेछौँ ।’

योग शिविरले सहभागीहरूलाई मानसिक स्थिरता, शारीरिक स्वास्थ्य सुधार तथा आध्यात्मिक उन्नतिका लागि प्रेरित गरेको छ ।

प्रतिक्रिया

लेखकको बारेमा

4KNationalDaily