पोखरा– पर्यटकीय जिल्ला मुस्ताङका होटेल भरिभराउ भएका छन् । दसैँको छेकोमा आन्तरिक पर्यटक बढेका कारण होटलहरु प्याक भएका हुन् ।

होटेल पूर्व बुकिङ गरेर नगएकाहरू मुस्ताङबाट रातारात फर्किने गरेका व्यवसायीहरूले बताए ।

‘कोठाहरू प्याक छन् । धेरैले अग्रिम बुकिङ गरेर आउँछन्,’ घरपझोङ गाउँपालिका अध्यक्ष मोहनसिंह लालचन भन्छन्, ‘बुकिङ नगरि आएका पर्यटकले कोठा पाउन मुस्किल छ ।’

उनका अनुसार बिहीबार पर्यटक धेरै भएर केही पर्यटकहरू धर्मशालामा बसेर फर्किएका छन् भने धेरै पर्यटक म्याग्दीतर्फ झरेर बसेका छन् ।

जिल्ला प्रहरी कार्यालय मुस्ताङका अनुसार बिहीबार मात्रै करिब ५ हजार ४ सय पर्यटक मुस्ताङ छिरेका थिए ।

‘गाडीबाट ५ हजार १ सय भन्दा बढी आए । ९ वटा उडान भएको थियो । फ्लाइटबाट २ सय जति आए होला,’ डिएसपी भोज पाण्डेले भने, ‘पर्यटक खचाखच छन् । होटलहरु भरिएका छन् ।’

धेरैजसो पर्यटक अग्रिम बुकिङ गरेर गएका उनले बताए । ‘दसैँको अवधि भएर पनि धेरै पर्यटक आएका हुन सक्छन् । यति धेरै पर्यटक आक्कलझुक्कल मात्रै पुग्छन्,’ उनले भने, ‘शुक्रवार केही पातलिएको छ ।’

मुस्ताङका होटलहरुमा करिब ५ हजार पर्यटक राख्न सक्ने क्षमता छ । माथिल्लो क्षेत्रमा बढी चिसो भएर हिउँ जम्न थालेको छ ।

‘छोसेरमा तापक्रम माइनस ७ पुगिसक्यो । मुक्तिनाथमै पनि रातमा माइनस २ पुग्यो,’ उनले अघि थपे, ‘अब जम्ने समय सुरु भयो ।’ बढी चिसो भएका कारण माथिल्लो क्षेत्रमा पर्यटकको आउजाउ बिस्तारै घट्न थालेको छ ।